പുത്തന്‍വേലിക്കര : എന്റെ ഗ്രാമം

പുത്തന്‍വേലിക്കര. എറണാകുളം-തൃശൂര്‍ ജില്ലകളുടെ അതിര്‍ത്തിപ്രദേശത്ത് സ്ഥിതി ചെയ്യുന്ന നാട്ടിന്‍പുറം.കൌതുകകരമായ സ്ഥലപ്പേര് അല്ലേ. ഇതെന്താ, പുതിയ വേലികളുള്ള കരയാണോ എന്നു പലരും എന്നോട് ചോദിച്ചിട്ടുണ്ട്. എന്നാല്‍, നൂറ്റാണ്ടുകള്‍ക്ക് മുന്‍പുണ്ടായ വലിയൊരു വേലിയേറ്റത്തില്‍ കടലായിരുന്ന പല ഭാഗങ്ങളും കരയായി മാറുകയും കരയായിരുന്നവ കടലായി മാറുകയും ചെയ്തുവത്രേ. അതുവരെ കണ്ടിട്ടില്ലാത്തവിധം ഉണ്ടായ പുത്തന്‍ വേലിയേറ്റത്തില്‍ സൃഷ്ടിക്കപ്പെട്ട കരയാ‍ണ് പുത്തന്‍വേലിക്കര എന്നാണ് ഐതിഹ്യം. പുഴകളും, തോടുകളും വയലുകളും കുളങ്ങളും കുന്നുകളും കൊണ്ട് സമ്പന്നമായിരുന്ന പ്രദേശം.കാലഘട്ടത്തിന്റെ അനിവാര്യതയാല്‍ ഇന്ന് ആ സമ്പന്നതക്ക് മങ്ങലേറ്റുതുടങ്ങിയിരിക്കുന്നു എന്ന് പറയാതെ വയ്യ. എങ്കിലും..
ചില ദൃശ്യങ്ങള്‍ ഇതാ, നിങ്ങള്‍ക്കായി..

പെരിയാറിന്റേയും ചാലക്കുടിപ്പുഴയുടേയും സംഗമസ്ഥാനം. കണക്കന്‍ കടവ് പാലത്തില്‍ നിന്നുള്ള ദൃശ്യം..




പെറിയാറിന്റെ തീരത്തുള്ള മാളവനയില്‍ നിന്നുള്ള ദൃശ്യം






പുഴയിലുള്ള പുരാതനമായ പാറക്കൂട്ടം: മാളവന പാറ.





പുഴയുടെ തീരത്തൊരു കൊച്ചു ക്ഷേത്രം: മാളവന ശിവക്ഷേത്രം.



ക്ഷേത്രത്തിനു മുന്നില്‍ നിന്നുള്ള പുഴയുടെ ദൃശ്യം


ഒരേ മതില്‍ക്കെട്ടിനുള്ളില്‍ രണ്ട് അമ്പലങ്ങള്‍: പടിഞ്ഞാട്ട് അഭിമുഖമായി കരോട്ടുകര ശ്രീകൃഷ്ണസ്വാമി ക്ഷേത്രവും കിഴക്കോട്ട് അഭിമുഖമായി കാട്ടുനിലത്ത് സുബ്രഹ്മണ്യസ്വാമി ക്ഷേത്രവും. ബാല്യ കാല സ്മരണകള്‍ ഉറങ്ങിക്കിടക്കുന്ന ക്ഷേത്രപരിസരം. “അമ്പലവാസി”കളില്‍ പിഷാരടി സമുദായത്തില്‍ പെട്ട ഞങ്ങള്‍ക്ക് തലമുറകളോളം ഉപജീവനമാര്‍ഗ്ഗമായിരുന്നത് ഈ ക്ഷേത്രങ്ങളിലെ കഴകവൃത്തിയായിരുന്നു.











കല്‍ത്തൊട്ടി: പണ്ട്, മേയാന്‍ വിടുന്ന പശുക്കള്‍ക്ക് ദാഹം തീര്‍ക്കുവാന്‍ അമ്പലമുറ്റത്ത് വെള്ളം നിറച്ചിട്ടിരുന്ന തൊട്ടി. പൂര്‍ണ്ണമായും കരിങ്കല്ലില്‍ നിര്‍മ്മിച്ചത്. ഇന്നിത് ഉപേക്ഷിക്കപ്പെട്ട നിലയിലാണ്.



അമ്പലക്കുളം. ഒരുകാലത്ത് കിംവദന്തികളും പരദൂഷണങ്ങളും തുടര്‍ന്നുള്ള വാക്പയറ്റുകളും കൊണ്ട് ശബ്ദമുഖരിതമായിരുന്ന ഇടം. ഇന്ന് ഏറെക്കുറെ ശാന്തം.